Historiettas e contos in interlingua/Le episcopo embarassate

Le episcopo embarassate

Marchese de Sade

Il es assatis curiose le idea super le blasphemias que ha alcun personas pie. Illes crede que certe litteras del alphabeto, ordinate de un maniera o altere, pote tanto agradar infinitemente le Eternal in un de ille sensos como, disponite in altere, ultragiar le horribilemente, e iste prejudicio es sin dubita un del plus radicate que offusca le gente devote.

Al categoria del personas scrupulose concernente le “b” e le “f” pertineva un ancian episcopo de Mirepoix, que in le initio de iste seculo era reguardate como un sancto. Quando un die ille iva vider le episcopo de Pamiers, su carrossa se blocava in le fango del camminos horribile que separa iste duo citates: omne effortio era van, le cavallos non poteva facer plus.

–Misenior –exclama finalmente le cochiero, super le puncto de exploder– durante que vos restara ibi, mi cavallos non avantiara.

–E proque non? –responde le episcopo.

–Proque il es absolutemente necessario que io blasphema e Vostre Illustrissime se oppone a illo; e assi, nos passara le nocte hic si vos non me lo permitte.

–Va ben –respondeva le dulciastre episcopo signante se–, que tu blasphema igitur, filio mio, ma le minus possibile.

Le cochiero blasphema, le cavallos tira, misenior monta de novo… e illes arriva sin accidente.