Historiettas e contos in interlingua/Un ver amico
Un ver amico
[modificar]Per Harleigh Kyson Jr.
Un arabe qui iva morir vocava a se su filio e diceva, "Dice me, filio, quante amicos ha tu aquirite durante que io ha vivite?" In responsa, su filio diceva, "Io crede que io ha aquirite cento amicos."
Tunc diceva le patre, "Un philospho dice, 'Non lauda un amico ante probar le.' Io vermente es vetule e io ha acquirite solmente le medietate de un amico. Como ha tu aquirite cento? Vade tunc a probar les omnes, e apprende si ulles ex illes essera pro te un ver amico."
Le filio diceva in responsa, "Como les probara io?" E le patre diceva, "Occide un vitello, talia lo in pecias, e pone lo in un sacco, e le sacco essera tintate con sanguine. E quando tu venira a un amico, dice, "Car amico mie, io ha occidite un homine per accidente, e io te implora a interrar le. Io te roga proque nemo habera suspiciones que tu lo faceva, e assi tu potera salvar me."
Le filio faceva lo que su patre mandava. Ma le prime amico al qual ille veniva diceva, "Porta via ille homine morte circum tu proprie collo. Tu ha facite alique mal, e tu debe pagar le penalitate! Tu nunquam intrara in mi casa." Il faceva isto con omne su amicos, e omnes le dava le mesme responsa.
Le filio retornava a su patre e annunciava lo que ille habeva facite, e su patre diceva, "Lo que te eveniva es exactemente lo que diceva le philosopho: 'On sempre ha multe amicos in conditiones de prosperitate ma pauches in conditiones de necessitate.' Vade a mi semiamico e vide lo que ille dice. Ille vadeva a iste amico e narrava lo que ille habeva dicite al altere amicos sue. "Intra in mi casa," diceva iste amico. "Nos non debe facer disseminar iste secreto!"
Le amico de su patre inviava via su marita con omne su familia e excavava un tumba. Ma post vider omne iste preparationes, ille explicava lo que vermente habeva occurrite, dicente gratias a ille. Ille tunc retornava a su patre e narrava toto, e su patre diceva, "Concernente un tal amico le philosopho dice, "Ille es vermente un amico qui te adjuva quando le mundo te falle."